Ef þið viljið senda mér umsögn um árangur heilunarinnar sem má birta hér á heimasíðunni, þá megið þið senda mér hana á tölvupósti á kristinnjosepg@gmail.com.
Ég frétti af Kristni Jósep í gegnum góðan vin sem hafði góða reynslu af honum. Hann spurði mig hvort maðurinn minn, sem nú er á hjúkrunarheimili hefði áhuga á að hitta hann. Ég sagði honum að hann hefði lítinn athuga á svona löguðu en að ég skyldi ræða það við hann. Stuttu síðar hafði Kristinn samband við mig og sagði mér frá sér og sínu góða starfi. Það varð úr að maðurinn minn samþykkti að fá hann í heimsókn og Kristinn hefur verið við hlið hans og okkar síðan. Hann hefur komið nokkrum sinnum til hans á hjúkrunarheimilið og einnig veitt honum fjarheilun.
Þann 10. apríl síðastliðinn varð maðurinn minn alvarlega veikur. Þar sem hann hafði látið í ljós á hjúkrunarheimilinu þann vilja sinn að allt yrði gert fyrir hann ef til svona alvarlegra veikinda kæmi var hann fluttur á bráðadeild. Á bráðadeildinni tók á móti honum her af góðu fólki sem kunni og vildi gera allt sem hægt var fyrir hann. Kristinn Jósep var erlendis í fríi, en ég sendi honum SMS og bað hann um hjálp. Hann fylgdi manninum mínum í gegnum þessa raun með fjarheilun.
Um kvöldið var maðurinn minn með takmarkaða meðvitund og ástandið tvísýnt. Okkur var gerð grein fyrir því að ekki væri víst að hann hefði þetta af, en það gerði hann. Næsta morgun færði læknir okkur þær góðu fréttir að allt virtist í góðu lagi og að hann væri ekki lengur í lífshættu. Hann vildi þó flytja hann á sjúkraherbergi og fylgjast áfram með honum í tvær nætur. Eftir þriðju nóttina hans á spítalanum hringdi læknirinn í mig og sagði að allt væri í lagi og að hann gæti farið aftur á hjúkrunarheimilið. Mér fannst hann eins glaður og ég og jafnframt hissa. Ég þakkaði honum fyrir allt og sagðist aldrei hafa orðið vitni að slíkri fagmennsku við svona erfiðar aðstæður. Ég sagði honum einnig að ég hefði verið í sambandi við heilara í gegnum þetta allt og að e.t.v. hefði hann fengið góða aðstoð við að koma manninum mínum gegnum þetta áfall. Hann svaraði því til að það gæti alveg verið.
Ég þreytist ekki á því að segja frá því hversu mikið Kristinn Jósep hefur gert fyrir okkur. Margir, einkum þeir veiku og í vanda biðja þá um upplýsingar um hvernig megi komast í samband við hann. Ég hef komið því áleiðis og þó hann hafi mikið að gera, þó hann sé í fríi er hann alltaf boðinn og búinn. Mér er það bæði ljúft og skylt að benda vinum og vandamönum á Kristinn Jósep. Nú er þessi langþráða síða hans komin í loftið og gott að geta bent á hana kristinnjosep.com Ein vinkona mín þakkaði mér fyrir að hafa sent þennan engil til sín, já það má segja að hann sé engill í mannsmynd. Hann er það a.m.k. í okkar lífi og við erum honum afar þakklát.
Toby Sigrún Herman
Á síðustu þremur árum hef ég leitað heilunar hjá Kristni Jósep. Fyrst kom ég til hans vegna mikilla vekja á nýrnasvæðinu, ég var búin að vera sárkvalin og ósofin í tvo sólahringa áður en ég fór til Kristins Jósep. Eftir ca. hálftíma heilun hurfu verkirnir og ég hef ekki fundið fyrir þeim síðan. Síðan kom ég til Kristins Jóseps vegna mikilla verkja í únlið, það gekk eins og í fyrra skiptið verkirnir voru horfnir eftir hálftíma. Nú síðast kom ég til hans vegna þess að ég hafði verið með höfuðverk og svima í nokkrar vikur, eftir ca. háfltíma heilun hvarf verkurinn og sviminn og hefur nú hálfu ári síðar ekki komið aftur. Kristinn Jósep hefur hjálpað mér mikið.
Erna Sigrún Erlendsdóttir.
Strákurinn minn sem var þá 6 ára glímdi við martraðir allar nætur í marga mánuði, hann vaknaði á sama tíma á hverri nóttu, og þegar hann vaknaði var alltaf sama hræðslan, það var eins og hann væri milli svefns og vöku og gæti ekki alveg komið sér útúr þessum aðstæðum þegar þær byrjuðu, og maður náði lítið til hans.
Við ákváðum að spyrja Kristinn Jósep afa minn hvort hann gæti hjálpað honum.
Hann sagðist vera tilbúinn að koma til okkar og sjá hvað hægt væri að gera. Farið var með bænir og síðan fór afi inn í herbergi sonar míns sem þar lá sofandi og dvaldi þar um stund og sagðist hafa beðið þá um að hreinsa óværuna sem var sest að í herberginu.
Nóttina eftir þetta kvöld svaf drengurinn minn svo vel, vaknaði ekkert og hefur ekki fengið þessar martraðir síðan, hann er 8 ára í dag.
Takk afi minn.
- Margrét Eyjólfsdóttir
Kristinn Jósep Gíslason bauð Agli Ólafssyni, tónlistarmanni og leikara að koma til sín í heilun, þegar hann frétti að hann væri að glíma við Parkinson sjúkdóminn. Egill þáði boðið, þó hann þekkti manninn ekki, enda fannst honum hann ekki geta slegið á útrétta hendi og góðmennska og göfuglyndi hafa alltaf höfðað til Egils. Stundirnar hjá Kristni voru notalegar, að sögn Egis. Hann settist í stólinn hjá honum og sofnaði nær samstundis. Eftir á fannst honum hann léttari og kvikari, að minnsta kosti um sinn. Kristinn hefur líka sent Agli fjarheilun, þar sem þeir sammælast um stað og stund og svo sendir Kristinn honum heilun yfir haf og lönd. Það hefur ekki síður virkað vel.
Þegar dóttir okkar, Ellen Erla, veiktist hastarlega og þurfti að gangast undir mjög áhættusama skurðaðgerð, þar sem brugðið gat til beggja vona, bauðst Kristinn til að senda henni ljós og kraft. Hann sagðist jafnframt ætla að biðja "sína menn" um hjálp. Hann vildi vita nákvæmlega stað og stund aðgerðarinnar, til að þetta gæti orðið sem áhrifaríkast, en hún fór fram á háskólasjúkrahúsinu í Varsjá, Póllandi.
Dóttir okkar sagði okkur nokkru síðar að hún hefði orðið fyrir dásamlegri lífsreynslu rétt fyrir aðgerðina. Hún hefði verið skilin eftir fram á gangi í stutta stund, meðan einhverju var hagrætt inni á skurðstofunni fyrir aðgerðina og sem hún lá í rúminu sínu og beið, fannst henni allt í einu eins og hún væri hjúpuð skærri og fallegri gulri birtu.
Aðgerðin gekk vonum framar, eða "surprisingly well" eins og læknarnir orðuðu það og við trúum því að þar hafi heilun og hjálp frá Kristni haft sitt að segja 🙏
Tinna Gunnlaugsdóttir
Ég frétti af honum Kristni í gegnum móður mína, þar sem hún leitaði ráða við kvíða sem ég hafði glímt við vegna dansferils míns og frammistöðu mína í honum. Álagið var mikið og kvíðinn var stöðugur sem átti uppsprettu sína vegna væntinga þjálfara minna og annarra sem stóðu mér nærri á frammistöðu minni í dansinum. Móðir mín hafði samband við Kristinn og fór ég í tvo dáleiðslutíma til hans. Ég var léttari eftir tímana sem og fannst mér eins og ákveðin byrgði hafði verið létt af mér sem hafði þær afleiðingar að dansferill minn fór á flug. Ég var byrjuð að vinna mót sem mig hafði aldrei órað fyrir að ég gæti unnið og varð mun sjálfsöruggari. Ég á honum Kristni mikið að þakka fyrir að hjálpa mér að komast í gegnum þær hraðahindranir sem voru á mínum vegi svo að ég gæti náð meiri árangri í dansferlinum.
- Lilja Rún
Sinabólgur (tendonitis) í mjöðmum er fúlasta alvara og hin alopatíska læknisfræði hefur engin góð svör við. Ég hef stundað golf í marga áratugi og oft tekið vel á því við æfingar án þess að það hafi valdið áverkum. Öðru máli gegndi sl. vor en þá gerðist ég sekur um að hlusta ekki á líkamann og þjösnaðist áfram, þangað til mér var fyrirmunað að geta sveiflað golfkylfu; ósjálfráða taugakerfið sagði hingað og ekki lengra.
En af hverju núna eftir áratuga æfingar? Kannski aldurinn, en þegar ég kíkti í baksýnisspegilinn, gæti verið að blóðflæðið sl. tæpt ár eða svo hafi verið lakara en ég á að venjast, sem ég merkti af köldum höndum og fótum á háttatíma. En hver sem orsökin var, þá voru góð ráð dýr, því golf er mikilvægur þáttur í lífi mínu. Þegar ég rakst á færslu á Facebook frá Ólafíu dóttur Kristins um að hann væri að bjóða upp á þessa þjónustu, hikaði ég ekki í eina sekúndu að hafa samband við fyrrum nágranna minn og sagði honum sögu mína.
Ekki stóð á viðbrögðum, Kristinn setti málið strax í farveg og morguninn eftir fann ég strax að eitthvað hafði verið átt við mig; fann hita í mjöðmunum, eins og ég hefði fengið gott nudd og það sem kom mér mest á óvart næstu daga á eftir, var að hand- og fótakuldinn var ekki lengur til staðar. Fyrir mann eins og mig, sem leitar alltaf í vísindagreinar til að reyna að fá svör við hlutum sem ég skil ekki, var þetta góð lexía og áminning um að temja sér auðmýkt og að vera laus við fordóma.
Takk fyrir mig! Helgi Örn Viggósson
Mig langar að þakka Kristni Jósep Gíslasyni fyrir hans hjálp.
Fyrir að hafa hjálpað Hrólfi Egilssyni, eiginmanni mínum, að ná heilsu á ný.
Eftir að hafa skyndilega veikst alvarlega, hefur Hrólfur náð heilsu á ný með hjálp K.J.G.
Fyrir það er ég svo óendanlega þakklát.
Guðrún K. Hauksdóttir
Ágæti Kristinn Jósep!
Ég er búinn að heyra ótrúlegar sögur um það hvað þú hefur hjálpað mörgu fólki.Viðkona okkar hjóna hvatti mig til að hafa samband við þig.
Mig skortir eiginlega lýsingarorð til að dásama starf þitt og bakhjarla þinna. Ég er yfir mig þakklátur með þá hjálp sem þú hefur veitt mér.
Þegar ég hafði samband við þig, eftir hvatningu Þóru Stefánsdóttur vinkonu okkar hjóna voru vandamál mín bakverkir, óþægindi í kálfum og sífell þvaglát. Ég þurfti að ganga með tvær hækjur,
sífelldur pirringur í kálfum sérstaklega á kvöldin og þvaglát án neins fyrirboða.
Í fyrstu heilunartímunum (sjálfsheilunarhugleiðslunni) voru ónot í fótunum að trufla mig svo ég naut ekki stundarinnar eins vel. En smá saman naut ég þessa stunda betur og betur og var í algerri sæluvímu í síðustu skiftin. Nú eftir hjálp þína er staðan þessi: Ég get suma daga gengið án þess að nota hækjurnar, það er í fyrsta skiftið í mörg ár sem ég get gengið án hjálpartækja.
En svo koma aðrir sem ég verð að styðjast við þær. Tvo daga í röð hafði ég engin not fyrir hækjurnar og hafði engin ónot í líkamanum. En síðar þurfti ég á hækjunum að halda. Kanski hef ég farið of geyst af stað.
Óþægindi í fótunum eru að mestu horfin. Það er helst á kvöldin þegar ég ætla einmitt að fara að hlusta á þig. Ég hef freistast til þess að halda áfram að hlusta á þig (eftir 21 dag) og ef óeirðin í fótunum truflar ekki líður mér undur vel. Líðan mín er því allt önnur en áður en ég leitaði til þín, þvaglátin eru til dæmis ekki lengur til vandræða. Ég finn að eitthvað stórfenglegt er að gerast.
Ég endurtek þakklæti mitt fyrir hjálpina og mun með mikilli gleði styðja sjóð krabbameinssjúkra barna.
Bestu kveðjur á ljúfum vordegi í Borgarnesi.
Ingimundur Ingimundarsson